I Mas-ciari

di Valcalda

…i copa ‘l mas-cio!

…ciapèlo!...lighèlo!...portèmelo qua!
ma ‘l mas-cio ‘l ghe scapa in corte, spaurà.
No ste’ spaventarlo, sentì come’l siga,
bisogna coparlo, …maria che fadiga!

In tanti i lo ciapa e sora ‘na tola
‘l cortelo i ghe pianta, in mezo a la gola.
E tuti che varda, …maria che impression!
‘nte un lampo se impiena de sangue ‘l secion.

Po’ sora ‘na tola co’ l’acqua bolente
svelti i ghe tole la pele da rente.
Pi’ tardi i lo squarta, l’è tuto un sgiossare
in mezo a la corte par farlo sugare.

Adesso l’è pronto, se pol scumissiare
tajarlo su in tochi e darse da fare;
morette, sopresse, luaneghe e codessini
prodotti speciali pa’ i gusti più fini.

Dirige i lavori un bravo norcin
che ogni tanto ‘l se beve un bel goto de vin,
e finio ‘l lavoro…i zè sta proprio bravi!
Quanto saladi desso pencola dai travi.